سهى سهيل منيمنة، بنت بيروت يلي ربيت بشوارعها من بربور للنويري وطريق الجديدة وبرج أبي حيدر واللبان، تنقّلت بين أحياءها وحطّت خبرتها كمهندسة مختصّة بالتنظيم المدني لمصلحة مدينتها. وهالسنة ترشّحت لانتخابات بلدية بيروت.

رسالة سهى

اشتغلنا سوا بالوقت يلي كانت فيه بلديّة بيروت مغيّبة بالانهيار المالي والانفجار والحرب الأخيرة، وسوا منقدر نكمّل المشوار لننهض بمدينتنا بيروت. بيروت لازم ترجع مدينة آمنة منمشي بطرقاتها بدون خوف من المجهول والإهمال يلي عانينا منه بآخر سنين. لازم ترجع مدينة عادلة لإلنا كلنا، منسكن ببيوتها بكرامة. مدينة إرثها وتراثها محفوظ، منرفع راسنا بس نقول نحن بناتها وأبنائها. مدينة بكل حي فيها في مساحة للتنفّس واللعب وشطّها نضيف ومنظّم. مدينة منحطلّها سوا وجهة واضحة ومخطط عصري. سوا حنسترجع بيروت، حنسترجع وسط البلد ومحلّاته وشوارعه، حنسترجع مرفأ بيروت يلي مسكّر علينا، حنسترجع الحياة بكل زاروب فيها. جاهزة خوض هالمعركة، ومستعدّة حطّ كل طاقتي ومعرفتي وخبرتي وشغلي لصالح مدينتنا، بس هالمرّة من قلب المجلس.

برنامج سهى لبلديّة بيروت

برنامجي لبلديّة بيروت هو جزء من البرنامج الأوسع للحملة، يلي طلع من رؤيتنا الموحّدة للمدينة. ومن منطلق إيماننا بأهميّة الشغل المشترك مع باقي أعضاء المجلس البلدي، رح نشتغل سوا لنحقّق هالرؤية بطريقة بتنسجم مع اختصاصاتنا، وشغلنا، وتطلّعاتنا لبيروت.

برنامجي بيهدف نرجّع بيروت مدينة عادلة وحيوية، من خلال عشر نقاط أساسيّة:

العمل مباشرةً مع الناس من خلال لجان أحياء
سكن لائق وعادل
شطّ نظيف ومساحات عامّة بجميع أحياء بيروت
حماية تراثنا المعماري والثقافي والشعبي
إعادة الحياة لمنطقة "البلد" (وسط بيروت)
الاستفادة من المرفأ ودمجه مع محيطه
خلق بيئة آمنة للجميع
تطوير مخطط عام ووجهة واضحة لمدينتنا
تفعيل إدارة المخاطر والكوارث للتصدّي للأزمات
حلول للأزمة الماليّة للبلديّة

المصاري يلي حتبقى حتروح لمراكز مجتمعيّة ببيروت:

١. حضانة الموئل: التابعة لدار الأيتام (من عمر يوم لأربع سنوات) يلي هدفها تدعم الأمّهات العاملات يلي اضطرّتهن الظروف يبعدوا عن أولادهم.

٢. بيت عام: مساحة بيلتقي فيها ناس من أطياف مختلفة حول نشاطات متعدّدة وبدون مقابل.